Општата цел на проектот финансиран од ЕУ „Техничка поддршка за подобрување на овозможувачката средина за граѓанските организации во Република Северна Македонија“ е зајакнување на ефективноста на граѓанското општество преку подобрување на овозможувачката средина за граѓанското општество, на централно и локално ниво, и преку структурирана соработка на граѓанските организации со јавните институции и бизнис заедницата во земјата.

Проектот се реализира преку две компоненти и поврзани активности:

Компонента 1: Поддршка на спроведувањето на главните цели од Стратегијата за соработка со граѓанското општество – Приоритет I

Активност 1.1: Подобрување на правната рамка за развој на граѓанското општество
Активност 1.2: Подобрување на институционалната рамка за развој на граѓанското општество
Активност 1.3: Подобрување на финансиската рамка за развој на граѓанското општество

Активностите од оваа компонента имаат за цел дополнително да ја подобрат правната, институционалната и финансиската рамка за развој на граѓанското општество преку обезбедување поддршка на владата и граѓанските организации во спроведувањето на главните цели од владината Стратегија за соработка со граѓанското општество.

Компонента 2: Поддршка на спроведувањето на Приоритет III од Стратегијата и директна и приспособена поддршка за граѓанските организации

Активност 2.1: Поддршка на Приоритетната област III од Стратегијата
Активност 2.2: Директна поддршка на малите „грасрут“ организации
Активност 2.3: Обезбедување приспособена обука и консултации за малите „грасрут“ организации

Активностите во рамките на оваа компонента првенствено ќе бидат фокусирани на спроведувањето на Механизмот за граѓанска отпорност, програма за директна поддршка за граѓанските организации, вклучително и приспособено градење капацитети. Дополнително, во рамките на оваа компонента ќе бидат преземени мерки за поддршка на Владата во спроведувањето на третата приоритетна област од Стратегијата на Владата за соработка со граѓанското општество која се однесува на социјалното претприемништво, обезбедувањето социјални услуги и волонтерството.